Featured LFP: Kalsadang nag-uugnay sa Kabuhayan at Pag-asa

Sa tahimik na pamayanan ng Bantan, sa bayan ng Orion, Bataan, isang proyekto ang nagsilbing daan patungo sa mas magandang bukas para sa mga residente—isang kwento ng pag-asa, progreso, at pagkakaisa. Sa halagang Php 6,606,882.17, naisakatuparan ang isang farm-to-market road sa A. Rodriguez Sr. Boulevard na hindi lamang nagbigay ng kaginhawaan sa araw-araw na pamumuhay ng mahigit 1,400 katao, kundi nagdala rin ng malaking pagbabago sa hanapbuhay ng mga mangingisda, na siyang pangunahing sektor ng kabuhayan sa lugar.

Ang proyektong ito ay bahagi ng FY 2023 Local Government Support Fund - Support to Barangay Development Project (LGSF-SBDP), isang programa na naglalayon ding mapabuti ang transportasyon at pagpapalitan ng mga produktong dagat mula sa mga barangay patungo sa merkado. Ang matagal nang pangarap ng mga mangingisda na magkaroon ng maayos na daan ay sa wakas natupad na, isang katuparan ng kanilang mga panalangin bilang mga tagapagtaguyod ng pamilya.

Ayon kay Punong-bayan Antonio Raymundo, Jr. "Malaking pasasalamat po sa proyektong natanggap ng aming pamayanan sa pamamagitan ng SBDP Program na ngayon ay pinakikinabangan na ng ating mga mandaragat. Makikita po natin ang positibong epekto nito. Sana po ay magpatuloy pa ang mga programang katulad nito para sa kapakinabangan ng mamamayan, lalo na ng bayan ng Orion.”

Pahayag naman ni Joan Magsakay, isang residente, na malaki ang naitulong ng daang ito para sa maayos na daloy ng mga sasakyan. Dati, kapag umuulan, aniya, ay sobrang hirap bumiyahe dahil maputik, pero ngayon ay mas maginhawa na ang paglabas-masok patungong bayan.

Ngayon, ang kalsadang ito ay hindi na lamang simpleng daanan. Ito ay naging daluyan ng buhay-komunidad—isang lugar kung saan nagtitipon ang mga tao, nagiging pasyalan din ng mga pamilya, at nagsisilbing tahimik na saksi sa pag-unlad ng kanilang barangay. Tunay na ang mga pag-unlad ay hindi lamang makikita sa anyo ng konkretong daan kundi sa pagbabago ng buhay ng bawat mamamayan.