Matagumpay na naisagawa ang tatlong pangkat ng pagsasanay sa ilalim ng programang "DELTA: Developing Effective Law Enforcement and Technical Abilities - A Drug Awareness Campaign cum Skills Enhancement Training for Barangay Tanods,” na dinaluhan ng mga Barangay Tanod mula sa mga bayan ng Minalin, Sta. Rita, Sasmuan, at Sto. Tomas.
Layunin ng pagsasanay na ito na palakasin ang kaalaman at kakayahan ng mga Barangay Tanod, hindi lamang sa pagpapatupad ng batas kundi pati na rin sa mga teknikal na kasanayan, upang matiyak ang kapayapaan at kaayusan sa kani-kanilang komunidad.
Ang bawat pangkat ay nabigyan ng masinsinang pagtuturo at praktikal na mga aktibidad upang masiguro na ang mga Tanod ay handang tumugon sa mga hamon ng kanilang tungkulin. Kabilang dito ang mga diskusyon ukol sa mga legal na aspeto ng pagpapatupad ng batas, epektibong komunikasyon, tamang proseso ng pag-aresto, at iba pang mahahalagang kasanayan na kinakailangan sa kanilang araw-araw na operasyon.
Lubos ang aming pasasalamat sa Provincial Peace and Order Council, sa pangunguna ni Gob. Dennis Pineda, at sa suporta ng PNP, PDEA, BFP, at CHR, na naging susi sa matagumpay na pagsasakatuparan ng aktibidad na ito—isang mahalagang hakbang tungo sa pagpapabuti ng seguridad at kaayusan sa mga barangay ng Pampanga.
