Tatlumpu't siyam (39) na maliliit at lokal na mga mangangalakal ang nakilahok sa programang Kadiwa ng Pangulo noong ika-17 ng Hulyo 2023 na inilunsad sa Lalawigan ng Bulacan. Dinayo ng tinatayang humigit-kumulang 3,000 tao ang nasabing pamilihan na dahilan upang agarang maubos ang mga panindang dala ng mga lumahok na negosyante.

Ang nasabing gawain ay pinangunahan ng Pamahalaang Panlalawigan, sa pamumuno nina Punong Lalawigan Daniel R. Fernando at Pangalawang Punong Lalawigan Alexis C. Castro, sa pakikipagtulungan ng mga Panlalawigang Tanggapan ng mga ahensya ng Pamahalaan kabilang na ang Kagawaran ng Interyor at Pamahalaang Lokal, NFA, DTI, DOLE, at DSWD.

Ang programang Kadiwa ng Pangulo ay naglalayong maghatid ng murang mga bilihin sa mga bulakenyo, gayundin ay mabigyan ang mga maliliit na mangangalakal, magsasaka, at mangingisda ng lugar na paglalagakan ng kanilang mga produkto na walang binabayarang upa at masiguro ang pagkakaroon nila ng karagdagang kita.